ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ

ՆԱԽԱԳԱՀ`                                                                                     Ա. ՂՈՒԿԱՍՅԱՆ

 

 

 

 

 

 

 

 

 

22 հոկտեմբերի 2005 թ.

ք.Ստեփանակերտ

ՀՕ-219

 

 

 

 

ՊԵՏԱԿԱՆ ԳՈՒՅՔԻ ՄԱՍՆԱՎՈՐԵՑՄԱՆ 2004-2006 ԹՎԱԿԱՆՆԵՐԻ ԾՐԱԳՐԻ ԿԱՏԱՐՄԱՆ 2004 ԹՎԱԿԱՆԻ ՏԱՐԵԿԱՆ ՀԱՇՎԵՏՎՈՒԹՅՈՒՆ

 

 

1.  ԸՆԴՀԱՆՈՒՐ ԴՐՈՒՅԹՆԵՐ

 

 1.1  Ծրագրի ընդունման ժամանակագրությունը, ծրագրում կատարված

       փոփոխությունները և լրացումները

 

«Պետական գույքի մասնավորեցման 2004-2006 թվականների ծրագրի մասին» Լեռնային Ղարաբաղի Հանրապետության օրենքը (այսուհետ` Ծրագիր) Լեռնային Ղարաբաղի Հանրապե-տության Ազգային ժողովի կողմից ընդունվել է 2004 թ. մայիսի 19-ին: Լեռնային Ղարաբաղի Հանրապետության Նախագահի կողմից այն ստորագրվել է 2004 թ. հունիսի 5-ին:

2004 թվականին  Ծրագրում փոփոխություններ և լրացումներ չեն կատարվել:

2004 թվականի մայիսի 19-ին Լեռնային Ղարաբաղի Հանրապետության Ազգային ժողովի կողմից  ընդունվեց «Պետական գույքի մասնավորեցման 2002-2003 թվականների ծրագրի կա-տարման 2003 թվականի տարեկան հաշվետվությունը հաստատելու մասին» Լեռնային Ղարաբաղի Հանրապետության օրենքը, որը Լեռնային Ղարաբաղի Հանրապետության Նախագահի  կողմից ստորագրվել է 2004 թվականի հունիսի 5-ին:

Նշված հաշվետվությունն ընդգրկում էր 2003 թվականի հունվարի 1-ից մինչև 2004 թվա-կանի հունվարի 1-ն ընկած ժամանակաշրջանը:

«Պետական գույքի մասնավորեցման (սեփականաշնորհման) մասին» Լեռնային Ղարաբաղի Հանրապետության օրենքի 4-րդ և 9-րդ հոդվածների համաձայն` Լեռնային Ղարաբաղի Հան-րապետության կառավարությունը Ծրագրի կատարման ընթացքի վերաբերյալ տարեկան հաշ-վետվություն է ներկայացնում Լեռնային Ղարաբաղի Հանրապետության Ազգային ժողով:

 

1.2 Հաշվետու ժամանակաշրջանը

 

Ծրագրի կատարման վերաբերյալ սույն  հաշվետվությունն ընդգրկում է 2004 թ. հունվարի 1-ից մինչև 2005 թ. հունվարի 1-ն ընկած ժամանակաշրջանը (այսուհետ` հաշվետու ժամանա-կաշրջան):

 

1.3 Հաշվետու ժամանակաշրջանում Ծրագրում նշված նպատակների

       իրագործման աստիճանը

 

Հաշվետու ժամանակաշրջանում Լեռնային Ղարաբաղի Հանրապետության կառավարության կողմից իրականացված միջոցառումներն ուղղված են եղել Ծրագրով սահմանված նպատակների իրագործմանը:

Հաշվետու ժամանակաշրջանում շարունակվել է մասնավորեցման այն քաղաքականությունը, որը հնարավորություն է տալիս մասնավորեցվող ընկերություններում և օբյեկտներում առավելագույնս ներգրավել ներդրումներ և ընկերություններն ու օբյեկտները  վաճառել ռազմավարական ներդրողներին` գործարար ծրագրերին համապատասխան:

Մասնավորապես հաշվետու ժամանակաշրջանում մասնավորեցված 13 ընկերություններից  (որից 3 ընկերություն  2002-2003 թվականների Ծրագրից) 8-ը վաճառվել են ուղղակի վաճառքի ձևով, իսկ 5-ը` մրցույթով: Նշված ձևերով մասնավորեցված ընկերությունների գնորդները  ստանձնել են ընկերություններում ներդրումներ կատարելու և աշխատողների համար սոցիալական երաշխիքներ ստեղծելու պարտավորություններ (աշխատատեղերի պահպանում և ստեղծում, աշխատավարձի ապահովում և այլն):

Մասնավորեցման արդյունքում տնտեսությունում ավելացել է մասնավոր սեփականության վրա հիմնված ընկերությունների թիվը: Մասնավոր սեփականության վրա հիմնված (այդ թվում` մասնավորեցված) ընկերությունների գործունեության արդյունավետության մասին` պետական բաժնեմաս ունեցող ընկերությունների համեմատ,  վկայում է  այն փաստը, որ հանրապետության համախառն ներքին արդյունքի 63.1 տոկոսը ստեղծվում է մասնավոր հատվածի գործունեության հաշվին: Մասնավորեցված ընկերությունների նոր սեփականատերերը կարճ ժամկետում մարում են իրենց՝ որպես իրավահաջորդների, փոխանցված` Լեռնային Ղարաբաղի Հանրապետության պետական բյուջեի և սոցիալական ապահովագրության պետական հիմնադրամի նկատմամբ ունեցած  պարտավորությունները:

Մասնավորեցման գործընթացի հրապարակայնությունն ապահովելու նպատակով մասնավորեցվող ընկերությունների և օբյեկտների մասին զանգվածային լրատվության միջոցներում հրապարակվել են տեղեկություններ և հայտարարություններ:

Հաշվետու ժամանակաշրջանում պետական գույքի մասնավորեցումից ստացված ֆինանսական միջոցները կազմել են 423.8 մլն դրամ, այդ թվում` ընկերությունների մասնավորեցումից` 367.8 մլն դրամ, ընկերությունների գույքի կազմից առանձնացված կառուցվածքային միավորների մասնավորեցումից` 24.5 մլն դրամ, «փոքր» և կիսավեր օբյեկտների մասնավորեցումից` 31.0 մլն դրամ և անավարտ շինարարության օբյեկտների մասնավորեցումից` 0.5 մլն դրամ:

Հաշվետու ժամանակաշրջանում մասնավորեցված ընկերությունների գնորդներին` որպես իրավահաջորդների, փոխանցված պարտավորությունների գումարը կազմել է 243.5 մլն դրամ, որից Լեռնային Ղարաբաղի Հանրապետության պետական բյուջեի նկատմամբ` 56.3 մլն դրամ, պարտադիր սոցիալական ապահովագրության վճարների գծով`  21.3 մլն դրամ:

Հաշվետու ժամանակաշրջանում ընկերությունների մասնավորեցման կատարողականը (առանց լուծարված և լուծարման գործընթացում գտնվող ընկերությունների) կազմել է 20.0 տոկոս` 2003 թվականի 30.7 տոկոսի համեմատ:

Հաշվետու ժամանակաշրջանում 2003 թվականի համեմատ մասնավորեցված ընկերությունների քանակը նվազել է:

Լեռնային Ղարաբաղի Հանրապետության պետական գույքի մասնավորեցման արդյունավետությանը խոչընդոտող և Ծրագրի կատարողականի վրա ազդող հիմնական գործոններից են`

- վճարունակ պահանջարկի սակավությունը.

- մասնավորեցման առաջարկվող մի շարք ընկերությունների հիմնական գործունեության անհեռանկարայնությունը, կուտակված խոշոր պարտքերի առկայությունը, հիմնական միջոցների ֆիզիկական և բարոյական մաշվածությունը.

- մասնավորեցման համար անհրաժեշտ ելակետային տվյալների փաթեթներում տեղ գտած թերությունները, որոնք հիմք են հանդիսացել փաթեթները հետ վերադարձնելու, դրանցում ճշգրտումներ և ուղղումներ կատարելու համար: Արդյունքում ձգձգվել են որոշ ընկերությունների մասնավորեցման նախապատրաստման ժամկետները.

- ներդնողների համար Ծրագրում ընդգրկված գրավիչ ընկերությունների թվի նվազումը:

 

2. ԾՐԱԳՐԻ ԻՐԱԳՈՐԾՈՒՄԸ

 

2.1. Ընկերությունների լուծարումը

 

Ծրագրում ընդգրկված պետական բաժնեմաս ունեցող 62 ընկերություններից հաշվետու ժա-մանակաշրջանում լուծարման գործընթաց է սկսվել մեկ ընկերության նկատմամբ:

Նախորդ տարիներից լուծարման գործընթացում գտնվող 11 ընկերություններից մեկը լու-ծարվել է, մնացածը լուծարման ընթացքի մեջ են:

Ընկերությունների լուծարման գործընթացը ձգձգվում է  լուծարվող ընկերությունների գույքի օտարման հետ կապված դժվարությունների պատճառով, որը պայմանավորված է օտարման ներ-կայացվող գույքի տեխնիկական անբավարար  վիճակով և աճուրդների կազմակերպման համար անհրաժեշտ ժամկետներով:

Հաշվետու ժամանակաշրջանում ընկերությունների լուծարման վերաբերյալ տեղեկություն-ները ներկայացված են թիվ 1 աղյուսակում:

 

2.2. Ընկերությունների մասնավորեցումը

 

Հաշվետու ժամանակաշրջանում մասնավորեցման են առաջարկվել 65 ընկերություններ,  որոնցից մասնավորեցվել է 13-ը կամ 20.0 տոկոսը:

Մասնավորեցումը չի կայացել 52 ընկերություններում:

Հաշվետու ժամանակաշրջանում մասնավորեցված 13 ընկերություններից 8-ը մասնավորեցվել է  ուղղակի վաճառքի ձևով,  5-ը` մրցույթով:

Հաշվետու ժամանակաշրջանում մասնավորեցված ընկերությունների մասին տեղեկություններն ըստ ճյուղերի ներկայացված են թիվ 2 աղյուսակում:

Ծրագրում ընդգրկված ընկերություններից հաշվետու ժամանակաշրջանում գնահատվել են 11 ընկերություններ, որոնց գնահատված արժեքը կազմել է 636.3 մլն դրամ:

 

2.2.1 Ընկերությունների ուղղակի վաճառքի ձևով մասնավորեցումը

      

Հաշվետու ժամանակաշրջանում ուղղակի վաճառքի ձևով մասնավորեցվել են 8 ընկերություններ, որոնց գնահատված արժեքը կազմել է 531.2 մլն դրամ, իսկ վաճառքի գինը`  178.3 մլն դրամ կամ  33.6 տոկոս:

Մարտունու «Ճանապարհաշինություն և վերանորոգում», «Շինանյութերի արտադրություն» և «Արցախագրոսպասարկում» Ստեփանակերտի մասնագիտացված վերանորոգման պետական փակ բաժնետիրական ընկերությունները մասնավորեցվել են տվյալ ընկերությունների աշխատավորական կոլեկտիվների անդամներին:

ՈՒղղակի վաճառքի ձևով մասնավորեցված ընկերությունների գնորդների կողմից հաշվետու ժամանակաշրջանում պետական բյուջե է մուծվել 69.59 մլն դրամ: Համաձայն «Պետական գույքի մասնավորեցման 2004-2006 թվականների ծրագրի մասին» Լեռնային Ղարաբաղի Հանրապետության օրենքի 6-րդ հոդվածի, աշխատավորական կոլեկտիվները մասնավորեցված պետական գույքի դիմաց վճարումները կատարում են տարաժամկետ վճարման կարգով:

ՈՒղղակի վաճառքի ձևով մասնավորեցված ընկերությունների գնորդները ստանձնել են կատարել 311.8 մլն դրամ ներդրում և ստեղծել 65 նոր աշխատատեղեր, այդ թվում` 2004 թվականին` 258.0 մլն դրամ ներդրում և 34  աշխատատեղ: Հաշվետու ժամանակաշրջանի վերջի դրությամբ փաստացի կատարված ներդրումները կազմել են 298.2 մլն դրամ, ստեղծված աշխատատեղերի քանակը` 51: Նշված ցուցանիշների գծով 2004 թվականի առաջադրանքները  կատարվել են համապատասխանաբար` 115.6 և 150.0 տոկոսներով:

ՈՒղղակի վաճառքի ձևով մասնավորեցված ընկերությունների գնորդներին (որպես իրավահաջորդների) մասնավորեցման պահին փոխանցված պարտավորությունների գումարը կազմել է 151.9 մլն դրամ, այդ թվում` Լեռնային Ղարաբաղի Հանրապետության պետական բյուջեի նկատմամբ` 23.7 մլն դրամ, սոցիալական ապահովագրության վճարների գծով` 12.2 մլն դրամ:

Հաշվետու ժամանակաշրջանում ուղղակի վաճառքի ձևով մասնավորեցված ընկերություն-ների մասին տեղեկությունները ներկայացված  են թիվ 3 աղյուսակում:

      

2.2.2. Ընկերությունների մասնավորեցումը մրցույթով

      

Հաշվետու ժամանակաշրջանում մրցույթով մասնավորեցման են առաջարկվել 5 ընկերություններ: Բոլոր ընկերությունների մասնավորեցումը կայացել է:

Մրցույթով մասնավորեցված ընկերությունների ընդհանուր գնահատված արժեքը կազմել է 167.8 մլն դրամ, իսկ վաճառքի գինը` 61.3 մլն դրամ կամ 36.5 տոկոս:

Հաշվետու ժամանակաշրջանում մրցույթով մասնավորեցված ընկերությունների  գնորդների կողմից  պետական բյուջե է մուծվել 43.4 մլն դրամ:

Մրցույթով մասնավորեցված 5 ընկերություններից երկուսը` Մարտակերտի «Թիվ 7 համաշինարարական» և «Թիվ 1 արդշինկոմբինատ» պետական փակ բաժնետիրական ընկերությունները, մասնավորեցվել են տվյալ ընկերությունների աշխատավորական կոլեկտիվի անդամներին, որոնք «Պետական գույքի մասնավորեցման 2004-2006 թվականների ծրագրի մասին» Լեռնային Ղարաբաղի Հանրապետության օրենքի 6-րդ հոդվածի համաձայն` մասնավորեցված պետական գույքի դիմաց վճարումները կատարում են տարաժամկետ վճարման կարգով:

Մրցույթով մասնավորեցված ընկերությունների գնորդները ստանձնել են առաջիկա երեք տարիների ընթացքում կատարել 124.8 մլն դրամ ներդրում և ստեղծել 48 նոր աշխատատեղ, այդ թվում` 2004 թվականին` 22.7 մլն դրամ ներդրում և 13 աշխատատեղ:

 Հաշվետու ժամանակաշրջանում փաստացի կատարվել է 48.5 մլն դրամ ներդրում և ստեղծվել է 58 նոր աշխատատեղ: Նշված ցուցանիշների գծով առաջադրանքները գերակատարվել են համապատասխանաբար` 2.1 և 4.4 անգամ:

Մրցույթով մասնավորեցված ընկերությունների գնորդներին (որպես իրավահաջորդների) մասնավորեցման պահին փոխանցված պարտավորությունների գումարը կազմել է 91.6  մլն դրամ, այդ թվում` Լեռնային Ղարաբաղի Հանրապետության պետական բյուջեի նկատմամբ` 32.6 մլն դրամ և սոցիալական ապահովագրության վճարների գծով` 9.1 մլն դրամ:

Հաշվետու ժամանակաշրջանում մրցույթով մասնավորեցված ընկերությունների մասին տեղեկությունները  ներկայացված  են թիվ 4 աղյուսակում:

      

2.3 Ընկերությունների գույքի կազմից առանձնացված կառուցվածքային միավորների 

      մասնավորեցումը

 

Հաշվետու ժամանակաշրջանում Ծրագրում ընդգրկված ընկերությունների գույքի կազմից առանձնացվել և մասնավորեցվել են 8 կառուցվածքային միավորներ, որոնց գնահատված արժեքը կազմել է 33.1 մլն դրամ, իսկ վաճառքի գինը` 11.2 մլն դրամ կամ 33.8 տոկոս: Մաս-նավորեցված բոլոր 8 կառուցվածքային միավորները  մասնավորեցվել են ուղղակի վաճառքի ձևով:

Մասնավորեցված 6 կառուցվածքային միավորների գնորդները ստանձնել են կատարել 40.5 մլն դրամի ներդրում և ստեղծել 41 նոր աշխատատեղ, այդ թվում` 2004 թվականին` 26.5 մլն դրամ ներդրում և 26 աշխատատեղ:

 Հաշվետու ժամանակաշրջանում փաստացի կատարվել է 33.5 մլն դրամ ներդրում և ստեղծվել է 30 նոր աշխատատեղ:  Նշված ցուցանիշների գծով առաջադրանքները կատարվել են համապատասխանաբար` 126.4 և  115.4 տոկոսներով:

 Հաշվետու ժամանակաշրջանում պայմանագրային պարտավորությունները չի կատարել Մարտունու «Կոմունալ տնտեսություն» պետական փակ բաժնետիրական ընկերության  Մարտու-նու քաղաքային հյուրանոցի գնորդ «Արջ-Սերվիս» փակ բաժնետիրական ընկերությունը: Պարտա-վորությունների չկատարումը պայմանավորված է մի շարք տեխնիկական հարցերի չլուծված լինելու հետ (հողահատկացում, ջրամատակարարում, կենտրոնացված կոյուղու բացակայություն և այլն): Ներկայումս քննարկման փուլում են գտնվում գնորդի առաջարկությունները` կապված լրացուցիչ ժամկետի տրամադրման հետ:

 Հաշվետու ժամանակաշրջանում մասնավորեցված ընկերությունների կազմից առանձնաց-ված կառուցվածքային միավորների մասնավորեցման վերաբերյալ տեղեկությունները ներկայաց-ված են թիվ 5 աղյուսակում:

 

2.4 Անավարտ շինարարության օբյեկտների մասնավորեցումը

 

Հաշվետու ժամանակաշրջանում Ծրագրում ընդգրկված 3 անավարտ շինարարության օբյեկտներից  մասնավորեցվել է 1-ը («Ծննդատուն» անավարտ շինարարություն,  ծածկագիր` 4053,   ք. Ասկերան, գնահատված արժեքը` 6.3 մլն դրամ, իսկ վաճառքի գինը` 1.6 մլն դրամ): Օբյեկտն ուղղակի վաճառքի ձևով մասնավորեցվել է «Ասկերան» արտադրական կոոպերատի-վին: Համաձայն մասնավորեցման պայմանագրի` 2004 թվականին պետական բյուջե է մուծվել 0.5 մլն դրամ: Գնորդը ստանձնել է մինչև 2005 թվականի վերջն օբյեկտում կատարել 6.4 մլն դրամ ներդրում, այդ թվում 2004 թվականին` 3.2 մլն դրամ և ստեղծել 4 աշխատատեղ, այդ թվում 2004 թվականին` 2 աշխատատեղ:

Հաշվետու ժամանակաշրջանի վերջի դրությամբ գնորդի կողմից փաստացի կատարվել է 3.5 մլն դրամ ներդրում և ստեղծվել է 3 աշխատատեղ:

 

2.5. «Փոքր» և կիսավեր օբյեկտների մասնավորեցումը

 

Հաշվետու ժամանակաշրջանում մասնավորեցվել են 23 «փոքր» և կիսավեր օբյեկտներ, որոնցից 16-ն` ուղղակի վաճառքի և 7-ն` աճուրդային վաճառքի եղանակով:

Հաշվետու ժամանակաշրջանի վերջին օրվա դրությամբ չմասնավորեցված «փոքր» և կի-սավեր օբյեկտներից 21-ը ներկայացված է աճուրդային վաճառքի, իսկ մնացածը գտնվում է մասնավորեցման գործընթացում:

Հաշվետու ժամանակաշրջանում մասնավորեցված «փոքր» և կիսավեր օբյեկտների մասին (ըստ մասնավորեցման ձևերի և ճյուղերի) տեղեկությունները ներկայացված են թիվ 6, թիվ 7 և թիվ 8 աղյուսակներում:

 

2.5.1 «Փոքր» և կիսավեր օբյեկտների ուղղակի վաճառքի ձևով մասնավորեցումը

 

Հաշվետու ժամանակաշրջանում ուղղակի վաճառքի ձևով մասնավորեցվել են 16 օբյեկտներ, որոնց գնահատված արժեքը կազմել է 19.7 մլն դրամ, իսկ վաճառքի գինը` 11.5 մլն դրամ կամ 58.4 տոկոս:

Նեդրումային պարտավորություններ ստանձնած ուղղակի վաճառքի ձևով մասնավորեց-ված 7 «փոքր» և կիսավեր օբյեկտների գնահատված արժեքը կազմել է 14.3 մլն դրամ, իսկ վաճառքի գինը` 6.1 մլն դրամ կամ 42.7 տոկոս: Այդ օբյեկտների գնորդները ստանձնել են կատարել 92.2 մլն դրամ ներդրում և ստեղծել 30 նոր աշխատատեղ:

Հաշվետու ժամանակաշրջանում փաստացի կատարվել է 11.0 մլն դրամ ներդրում և ստեղծվել է 8 աշխատատեղ: 2004 թ. առաջադրանքները կատարվել են. ներդրումների գծով` 54.5 տոկոսով, աշխատատեղերի գծով` 100 տոկոսով:

Պայմանագրային պարտավորությունները չի կատարել «Ջի-Էֆ» սահմանափակ պատաս-խանատվությամբ ընկերությունը: Պարտավորությունների չկատարումը կապված է օբյեկտում սեյսմիկ անվտանգության հարցերի լուծման հետ: Ներկայումս քննարկման փուլում է գտնվում գնորդին լրացուցիչ ժամկետի տրամադրման հարցը:

 

 2.5.2. «Փոքր» և կիսավեր օբյեկտների աճուրդով մասնավորեցումը

 

Հաշվետու ժամանակաշրջանում աճուրդով մասնավորեցման են առաջարկվել 39 «փոքր» և կիսավեր օբյեկտներ, որոնցից մասնավորեցվել է 7-ը` 2.1 մլն դրամ վաճառքի գնով:

Մարտունու առևտրի դուստր ձեռնարկության Հացի գյուղի խանութը, ծածկագիր` 1067, հանձնվել է գյուղական համայնքին, որպես գյուղապետարանի շենք օգտագործելու համար (Լեռնային Ղարաբաղի Հանրապետության կառավարության 2004 թ. մարտի 16-ի թիվ 73 որո-շում), Մարտակերտի առևտրի դուստր ձեռնարկության Աղաբեկալանջի խանութը, ծածկագիր` 6090, հանձնվել է գյուղական համայնքին, որպես հանդիսությունների տուն օգտագործելու համար (Լեռնային Ղարաբաղի Հանրապետության կառավարության 2004թ. դեկտեմբերի 21-ի թիվ 501 որոշում), «Մարտունու կենցաղսպասարկում» պետական փակ բաժնետիրական ընկե-րության թիվ 1 և թիվ 2 զոդման արտադրամասերի կիսավեր շենքերը, ծածկագիր` 6004 և 6056,  Մարտունու առևտրի  դուստր ձեռնարկության  պահեստի կիսավեր շենքը, ծածկագիր` 6001, հանվել են  աճուրդով վաճառվող օբյեկտների ցանկից` քանդման պատճառով (Լեռնային Ղարաբաղի Հանրապետության կառավարության 2004թ. հուլիսի 30-ի թիվ 262 որոշում):

Մասնավորեցման ընթացքում են գտնվում 6 «փոքր» և կիսավեր օբյեկտներ, մնացած 21 օբյեկտների մասնավորեցումը չի կայացել:

 

 2.6.Պայմանագրային պարտավորությունների կատարողականը

 

Հաշվետու ժամանակաշրջանի վերջի դրությամբ պայմանագրային պարտավորությունների կատարման ժամկետը լրացած ընկերությունների, ընկերությունների գույքի կազմից առանձնաց-ված կառուցվածքային միավորների, «փոքր» և կիսավեր օբյեկտների գնորդների կողմից պայմա-նագրային պարտավորությունների կատարման մասին (այսուհետ` ներդրումային ծրագրերով մասնավորեցված)`

ա) 11 ընկերությունների գնորդներ պարտավորվել են կատարել 1253.2 մլն դրամ ներդրում և ստեղծել 137 աշխատատեղ: Փաստացի կատարված ներդրումների ծավալը կազմել է 496.7 մլն դրամ, ստեղծված աշխատատեղերի քանակը` 86: Նշված ցուցանիշների գծով պարտավորությունների  կատարումը համապատասխանաբար կազմում է` 39.6  և 62.8 տոկոս:

Պայմանագրային պարտավորությունները չի կատարել Ստեփանակերտի «Ղարաբաղ» հյուրանոց պետական փակ բաժնետիրական ընկերության գնորդ «Սիրկապ Արմենիա»  փակ բաժնետիրական ընկերությունը` ներդրումների գծով՝ 764.8 մլն դրամ,  աշխատատեղերի գծով` 35: Պարտավորությունների թերի կատարումը պայմանավորված է հյուրանոցի հին մասնաշենքի սեյսմակայունության ապահովման խնդրի հետ: Ներկայումս կատարվում են շենքի ապամոնտաժման աշխատանքները, որի ավարտից հետո կսկսվի նոր շինարարություն: Հյուրանոցի շահագործման հանձնումը նախատեսվում է 2007 թվականին:

Աշխատատեղեր ստեղծելու պարտավորությունը թերի է կատարել Ասկերանի գարեջրի գործարանի գնորդ «Ադանա» փակ բաժնետիրական ընկերությունը, որը 35 աշխատատեղի փոխարեն ստեղծել է 12-ը:  Մնացած աշխատատեղերը կստեղծվեն գործարանի շահագործման հանձնման ժամանակ:

բ) Ներդրումային ծրագրերով մասնավորեցված ընկերությունների գույքի կազմից առանձնացված 7 կառուցվածքային միավորների գնորդներ պարտավորվել են կատարել 68.3 մլն դրամ ներդրում և ստեղծել 100 աշխատատեղ: Փաստացի կատարված ներդրումների ծավալը կազմել է 60.3 մլն դրամ կամ պարտավորությունները կատարվել են 88.3 տոկոսով: 100 աշխատատեղ ստեղծելու պարտավորությունը կատարվել է 35 տոկոսով (ստեղծված է ընդամենը 35 աշխա-տատեղ):

Պայմանագրային պարտավորությունները չի կատարել «Մրամոր, գրանիտ,  մոզաիկա» անհատական ձեռնարկությունը: Համաձայն «Պետական գույքի մասնավորեցման (սեփականա-շնորհման) մասին» Լեռնային Ղարաբաղի Հանրապետության օրենքի 30-րդ հոդվածի, հայց է ներկայացված Լեռնային Ղարաբաղի Հանրապետության առաջին ատյանի դատարան՝ մասնա-վորեցման պայմանագիրն անվավեր ճանաչելու և օբյեկտը հետ վերցնելու համար:

Պայմանագրային պարտավորությունները չի կատարել նաև Մարտունու «Կոմունալ տնտե-սություն» պետական փակ բաժնետիրական ընկերության Մարտունու հյուրանոցի գնորդ «Արջ-Սերվիս» փակ բաժնետիրական ընկերությունը:

գ) Ներդրումային ծրագրերով մասնավորեցված 8 «փոքր» և կիսավեր օբյեկտների գնորդներ պարտավորվել են կատարել 86.4 մլն դրամ ներդրում և ստեղծել 56 աշխատատեղ: Փաս-տացի կատարված ներդրումների ծավալը կազմել է 89.4 մլն  դրամ, կամ պարտավորությունը կատարվել է 103.5 տոկոսով, 56 աշխատատեղի փոխարեն ստեղծված է 36-ը, կամ պարտա-վորությունը  կատարվել է  64.3 տոկոսով:

Ստանձնած պարտավորությունները չեն կատարել`

- Մարտունու առևտրի դուստր ձեռնարկության հանրախանութի կիսավեր շենքի գնորդ «Ջի-Էֆ» սահմանափակ պատասխանատվությամբ ընկերությունը.

- Շուշիի նախկին երաժշտական գործիքների գործարանի կիսավեր շենքերի գնորդ «Մհեր» սահմանափակ պատասխանատվությամբ ընկերությունը:

Ներկայումս քննարկվում են գնորդներին պայմանագրային պարտավորությունների կատարման համար լրացուցիչ ժամկետներ տրամադրելու հարցերը: 

Ներդրումային ծրագրերով մասնավորեցված ընկերությունների, ընկերությունների գույքի կազմից առանձնացված կառուցվածքային միավորների, «փոքր» և կիսավեր օբյեկտների գնորդ-ների կողմից պարտավորությունների կատարման մասին տեղեկությունները ներկայացված են թիվ 9 աղյուսակում: