Ապրիլի 26-ին հրավիրվել է ԱՀ ԱԺ սոցիալական և առողջապահության հարցերի մշտական հանձնաժողովի նիստ, որը վարում էր հանձնաժողովի նախագահ Արամ Գրիգորյանը:

Նիստի օրակարգում սոցիալական ոլորտին առնչվող 2  նախագիծ էր, որոնք ներկայացրել է ԱՀ սոցիալական զարգացման և միգրացիայի նախարարի տեղակալ Վահրամ Առաքելյանը:

Արցախի Հանրապետության նախագահի կողմից օրենսդրական նախաձեռնության կարգով խորհրդարանի քննարկմանն է ներկայացվել ««Հայաստանի Հանրապետության 2004 թվականի աշխատանքային օրենսգիրքը Լեռնային Ղարաբաղի Հանրապետությունում գործողության մեջ դնելու  մասին» օրենքում լրացումներ կատարելու մասին» օրենքի նախագիծը:

Գործող աշխատանքային օրենսգրքով գործատուների կողմից աշխատանքային գրքույկ պահանջելու և վարելու պարտադիր պահանջը 2017 թվականի հունվարի 1-ից դադարեցված է: Միաժամանակ նախատեսված է հինգ տարվա ընթացքում աշխատանքային գրքույկում առկա տեղեկատվությունը, կառավարության սահմանած կարգով ներկայացնել լիազորված պետական կառավարման մարմին` տեղեկատվությունը պետական կենսաթոշակային համակարգի տվյալների շտեմարան ներառելու համար:

Քանի որ պատերազմական գործողությունների հետևանքով ներկայումս Արցախի Հանրապետությունում փաստացի բնակվող ու աշխատող կամ աշխատած անձանց աշխատանքային գործունեության տվյալները պահպանված չեն, նախագծով առաջարկվում է կանոնակարգել գործատուների կողմից աշխատանքային գրքույկներ վարելու գործընթացը` մինչև կառավարության սահմանած կարգով և ժամկետներում դրանցում առկա տեղեկատվությունը պետական կենսաթոշակային համակարգի տվյալների շտեմարան ներառելը:

Նախագծի ընդունման դեպքում «Պետական կենսաթոշակների մասին» օրենքի 32-րդ հոդվածի 5-րդ մասով նախատեսված դեպքում` լիազոր մարմնի կողմից ստեղծված հանձնաժողովների սահմանած աշխատանքային ստաժը հիմք կհանդիսանա աշխատանքի ընդունման համար պահանջվող աշխատանքի ստաժը հաշվարկելու համար:

Օրակարգի հաջորդ հարցը ««Ժամանակավոր անաշխատունակության և մայրության  նպաստների մասին» օրենքում փոփոխություն կատարելու մասին» օրենքի նախագիծն էր :

«Ժամանակավոր անաշխատունակության և մայրության  նպաստների մասին»  օրենքում ամրագրված է, որ եթե վարձու աշխատողի կամ ինքնուրույնաբար իրեն աշխատանքով ապահոված անձի մայրության նպաստը հաշվարկելու համար հիմք ընդունվող միջին ամսական աշխատավարձը կամ եկամուտը պակաս է 69 620 ՀՀ դրամից, ապա մայրության նպաստը հաշվարկելիս որպես միջին ամսական աշխատավարձ հիմք է ընդունվում 69 620 ՀՀ դրամը: Կառավարության ռազմավարական ծրագրերի համաձայն և պետական բյուջեի եկամուտների հաշվառումով, փուլային տարբերակով «Նվազագույն աշխատավարձի մասին» օրենքով կատարվում է նվազագույն աշխատավարձի շեմի բարձրացում, որի արդյունքում մի շարք օրենքներում կատարվում են համապատասխան փոփոխություններ։ Օրենքում ամեն անգամ նման փոփոխության կատարումից խուսափելու նպատակով  առաջարկվում է նվազագույն աշխատավարձի թվային արտահայտության փոխարեն ամրագրել, որ մայրության նպաստը հաշվարկվում է նվազագույն աշխատավարձի չափով։

ԱԺ սոցիալական և առողջապահության հարցերի մշտական հանձնաժողովը օրինագծերին հավանություն է տվել: