Նոյեմբերի 30-ին տեղի է ունեցել Արցախի Հանրապետության Ազգային ժողովի արտադրության և արտադրական ենթակառուցվածքների հարցերի ու ֆինանսաբյուջետային և տնտեսական կառավարման հարցերի մշտական հանձնաժողովների համատեղ նիստը՝ Վլադիմիր Կասյանի և Արթուր Հարությունյանի նախագահությամբ:

Օրակարգում «ԱՀ 2022թ. պետական բյուջեի մասին» ԱՀ օրենքի նախագծում նախատեսված արդյունաբերության, քաղաքաշինության, կադաստրի և պետական գույքի կառավարման, գյուղատնտեսության, տրանսպորտի և կապի, էներգետիկ համակարգի, բնապահպանության և բնական ռեսուրսների, խմելու և ոռոգման ջրի ոլորտների ֆինանսավորման հարցերն էին:

Գյուղատնտեսության նախարար Արմեն Թովմասյանը, ներկայացնելով գյուղատնտեսության ոլորտի 2022թ.-ի ծախսերը, նշել է, որ այն կազմելու է 5 մլրդ 738 մլն 500 հազ ՀՀ դրամ, ինչը 2021թ-ի՝ 9 մլրդ 293մլն 088,7 հազ ՀՀ դրամի համեմատ նվազել է 3 մլրդ 554 մլն 588,7 հազ ՀՀ դրամով:

Մանրամասնելով ծրագրային հատկացումները՝ նախարարը ներկայացրել է թվով 20 ծրագրի իրականացման շրջանակ։ Արմեն Թովմասյանը պատասխանել է պատգամավորների հնչեցրած՝ փոխհատուցվող սերմացուների ցանկին, սահմանային վարելահողերի անվտանգությանը, արոտավայրերի նվազմանը, տոհմային կենդանիների ներկրմանը, կարկտացանցերի կիրառմանը և ոլորտին առնչվող այլ հարցերի:

2022թ. բյուջեով, քաղաքաշինության նախարար Արամ Սարգսյանի խոսքով, կապիտալ ծախսերի համար նախատեսված է 30 մլրդ ՀՀ դրամ,որը ուղղվելու է կապիտալ ներդրումների պետական պատվերի ծրագրի գերակա բնագավառներին՝ բնակարանաշինությանը, կրթությանը, ճանապարհաշինությանը, մշակույթին և սպորտին, ԱՀ բնակավայրերում ջրամատակարարման և ջրահեռացման համակարգերին, ԱՀ բնակավայրերում ջեռուցման համակարգերի վերակառուցմանը և ԱՀ էներգետիկ համակարգերի արդիականացմանը։ Արամ Սարգսյանը պարզաբանումներ է տվել պատգամավորների՝ Ստեփանակերտի որոշ փողոցների ասֆալտապատմանը, ապաստարանների կառուցմանը, միջգյուղական ավտոճանապարհների բարեկարգմանը, բնակարանաշինությանը, տեղահանվածների բնակարանաշինության հայտարարված վերջնաժամկետին, հրետակոծությունից տուժած բնակարանների վերանորոգման աշխատանքներին վերաբերող հարցերին:

Տարածքային կառավարման և ենթակառուցվածքների նախարարության 2022թ. պետական բյուջեի նախագծով նախատեսվում է հատկացնել 19մլրդ 577մլն 460 հազ ՀՀ դրամ։ Նախարար Հայկ Խանումյանը մանրամասն ներկայացրել է հիմնական ծրագրային ուղղությունները և պատասխանել փոքր էլեկրակայանների կառուցմանը, բջջային և ինտերնետ կապի ծառայությունների բարելավմանը, ավտոբուսային պարկի թարմացմանը, ՇՏՀ–ին կից լաբորատորիայի գործարկմանը և արտադրանքի իրացմանը, ինչպես նաև ոլորտում առկա այլ խնդիրների վերաբերյալ պատգամավորների առաջադրած հարցերին:

ԱՀ կադաստրի և պետական գույքի կառավարման կոմիտեի 2022 թ պետական բյուջեի ծախսերը կազմելու են 606 մլն 555 հազ ՀՀ դրամ, որը նախորդ տարվա համեմատ ավելացել է 78 մլն 378,8 հազ ՀՀ դրամով։Կոմիտեի նախագահ Ս․ Գալստյանը պատասխանել է տեղահանված քաղաքացիների շարժական գույքի և տեղահանված բնակիչների չգրանցված գույքի փոխհատուցմանը կամ ֆինանսավորմանը վերաբերող հարցերին։

Մշտական հանձնաժողովների համատեղ նիստն այնուհետև շարունակվել է ընդմիջումից հետո։

ԱՀ բնակարանային հարցերի կոմիտեի նախագահ Ա․ Մանգասարյանի փոխանցմամբ 2022թ․ բյուջեով նախատեսված է 15 մլրդ 819 մլն 800,0 հազ ՀՀ դրամ, որից 12 մլրդ 985 հազ ՀՀ դրամը ուղղվելու է բնակարանային ապահովման ծրագրին, 2 մլրդ 5 մլն ՀՀ դրամը ՝ բնակտարածքները գույքով և կենցաղային տեխնիկայով ապահովման ծրագրին, 334 մլն 800 հազ ՀՀ դրամը՝ բնակարան վարձելու կամ ժամանակավոր կացարանով ապահովման նպատակով ֆինանսական օգնության տրամադրման ծրագրին։

Կոմիտեի նախագահը պատասխանել է 1988-92 թթ ԼՂՀ բռնագաղթված անձանց բնակարաններով ապահովելու, առաջարկվող ծրագրի սահմաններում բնակարանների տրամադրման սկզբունքների, բազմազավակ ընտանիքներին տրամադրվող բնակարանների արժողության և ոլորտին առնչվող այլ հարցերի։

ԱՀ ջրային կոմիտեի նախագահ Գ․ Հայրիյանը, ներկայացնելով ոլորտի ծրագրերը, նշել է, որ 2022թ․ բյուջեով նախատեսվում է տրամադրել 8 մլրդ 840 մլն ՀՀ դրամ, որի մեծ մասը՝ 8 մլրդ ՀՀ դրամը ուղղվելու է ջրային համակարգերի կառուցման, վերանորոգման, վերակառուցման և պահպանման ծրագրի աշխատանքներին։Պատգամավորների բարձրացրած հարցերը Պատարա- Ստեփանակերտ նոր ջրագծի կառուցման ու ջրասնուցման աշխարհագրության, նոր ջրագծերի կառուցման և առկա համակարգի բարելավման, ջրապաշարի բավարարվածության վերաբերյալ էին։

Բնապահպանության կոմիտեի նախագահի տեղակալ Ա․ Գաբրիելյանը նշել է, որ համակարգի բնականոն աշխատանքի կազմակերպման համար ոլորտի ծախսերը 2022թ․ պետական բյուջեով կազմելու են 211 մլն 79 հազ ՀՀ դրամ։

Հանրային ծառայությունները և տնտեսական մրցակցությունը կարգավորող պետական հանձնաժողովի ծախսերը, հանձնաժողովի նախագահ Գևորգ Գրիգորյանի տեղեկացմամբ 2022թ. բյուջեն կազմելու է 240,1 մլն ՀՀ դրամ։ Ըստ կանխատեսումների՝ 2022թ․-ին կարգավորող ընկերությունների կողմից ԱՀ պետական բյուջե կմուտքագրվի շուրջ 346,1 մլն ՀՀ դրամ։ Ոլորտի պատասխանաատուն պատասխանել է ռադիոհաճախականության տիրույթի հնարավոր անվտանգության և ինտերնետ կապի բարելավմանն ուղղված պատգամավորների հնչեցրած հարցերին։

Գյուղի և գյուղատնտեսության աջակցության հիմնադրամի նախագահ Հրանտ Սաֆարյանի փոխանցմամբ հիմնադրամին պետական բյուջեից այս տարի տրամադրվելու է 1մլրդ 316 մլն ՀՀ դրամ։Պահպանման ծախսերը կազմելու են 380 մլն դրամ։ Հիմնական ծախսերը ուղղվելու են առևտրային բանկերի կողմից գյուղատնտեսական ծրագրերի համար տրամադրվող վարկերի տոկոսների մասնակի սուբսիդավորմանը և առևտրային բանկերից և այլ ֆինանսական կազմակերպություններից ստացված վարկերի սպասարկմանը: Հիմնադրամի նախագահը պարզաբանումներ է տվել ոլորտին առնչվող հարցերին:

Արցախի ներդրումային հիմնադրամի 2022թ.-ի ծախսերը ներկայացրել է Արցախի ներդրումային հիմնադրամի նախագահի տեղակալ Մհեր Մխիթարյանը: Ըստ ներկայացրած տվյալների՝ 2022թ. պետական բյուջեի նախագծով «Աջակցություն Արցախի ներդրումային հիմնադրամին» ծրագրի շրջանակներում նախատեսվում է 4.0 մլրդ ՀՀ դրամ։ Հիմնադրամի նախագահի տեղակալը պատասխանել է վարկավորման նոր ծրագրերին վերաբերող հարցին։

Նիստին ներկա էին ԱՀ ԱԺ նախագահ Ա․ Թովմասյանը, նախագահի տեղակալ Գ․ Բաղունցը, պատգամավորներ, ֆինանսների նախարարի տեղակալ Ն․ Ավանեսյանը։