Մայիսի 27-ին տեղի է ունեցել ԱԺ ֆինանսաբյուջետային և տնտեսական կառավարման հարցերի մշտական հանձնաժողովի նիստը՝ Արամ Գրիգորյանի նախագահությամբ:

Նիստի ընթացքում քննարկվել է «Պետական գույքի մասնավորեցման 2019-2020թթ-ի ծրագրի մասին» Արցախի Հանրապետության օրենքի նախագիծը՝ էկոնոմիկայի և արտադրական ենթակառուցվածքների նախարար Լևոն Գրիգորյանի ներկայացմամբ ու ԱԺ պատգամավորներ Վարդգես Ուլուբաբյանի և Սերգեյ Հարությունյանի հեղինակած՝ ««Ավելացված արժեքի հարկի մասին» Արցախի Հանրապետության օրենքի նախագիծը:

Առաջին նախագծի վերաբերյալ հանձնաժողովը տվել է դրական եզրակացություն, իսկ երկրորդ օրինագիծը տարվել է լրամշակման:

Հանձնաժողովը քննարկել է նաև Լյուդմիլա Բարսեղյանի՝ Լեռնային Ղարաբաղի Հանրապետության պատվավոր կոչումների մասին» Լեռնային Ղարաբաղի Հանրապետության օրենքում փոփոխություն կատարելու մասին» Արցախի Հանրապետության օրենքի նախագիծը : Նախագծին տրվել է  բացասական եզրակացություն և առաջարկվել այն քննարկել հերթական նիստում:

Հաջորդիվ տեղի է ունեցել ԱԺ պետական-իրավական հարցերի մշտական հանձնաժողովի նիստը, որը վարում էր հանձնաժողովի նախագահ Հովիկ Ջիվանյանը:

Նիստին քննարկվել է Արդարադատության նախարար Արարատ Դանիելյանի ներկայացրած՝ «Արցախի Հանրապետության քննչական կոմիտեի մասին» Արցախի Հանրապետության օրենքների նախագծերի փաթեթը, որն արժանացել է հանձնաժողովի դրական եզրակացությանը:

Պետաիրավական հանձնաժողովի անդամներն այնուհետև լսել են Մարդու իրավունքների պաշտպանի 2018թ-ի գործունեության տարեկան հաղորդումը: