Թանկագի՛ն արցախցիներ,

Տարեմուտը միմյանց շնորհավորելու, իրար հետ ջերմություն և ուրախություն կիսելու լավագույն պահն է:

Անցնող տարին մարտահրավերների տարի էր՝ հիշողություններով, կորուստներով ու ձեռքբերումներով: Լավատեսությամբ, սեփական ուժերի հանդեպ հավատով ու միասնականությամբ հաղթահարեցինք մեր առջև ծառացած բոլոր դժվարությունները՝ հանուն հայրենիքի անվտանգության և բարօրության:

Մեր հետևողական ջանքերը՝ ժողովրդավարական գործընթացներն ամրապնդելու և տնտեսությունը զարգացնելու ուղղությամբ հիմք են տալիս վստահ լինելու, որ մեր պարտականությունները բարեխղճորեն կատարելով մասնակցում ենք ընթացող բարեփոխումներին:

Սիրելի՛ հայրենակիցներ,

Նոր տարին նոր երազանքներ կյանքի կոչելու ու ձեռքբերումները բազմապատկելու տարի է: Այս գիտակցումով՝ եկեք մեզ հետ վերցնենք միայն դրականը, նոր եռանդով ու պատրաստակամությամբ սկսենք մեր կյանքի հաջորդ փուլը:

Թո՛ղ նոր տարում յուրաքանչյուրիս կյանքում և բոլոր ընտանիքներում տիրի բարություն և ներդաշնակություն: Եվ այդպես էլ կլինի, եթե միշտ մեծարենք մեր ծնողներին, հոգատար լինենք մեր երեխաների հանդեպ ու գնահատենք հարազատների հետ անցկացրած ամեն մի րոպեն:

Ամանորի նախաշեմին իմ ու ընտանիքիս անունից շնորհավորում եմ ձեզ գալիք տոների առթիվ և անկեղծ սրտով ու մեծ սիրով մաղթում բոլորիս հաջողություններ. Արցախին, մայր Հայաստանին ու համայն հայությանը՝ խաղաղություն և բարեկեցություն:

Շնորհավո՛ր Ամանոր և Սուրբ Ծնունդ: