ԼՈՒՐԵՐ
Տարածքների թեման եթե հետաքրքրում է Ադրբեջանին, ապա Արցախը ևս կորցրած տարածքներ ունի. Աշոտ Ղուլյան
06 օգոստոսի 2018

Արցախի Հանրապետության Ազգային ժողովի նախագահ Աշոտ Ղուլյանի հարցազրույցը Banak.info-ին:  

Banak.info - Պարոն Ղուլյան, պատգամավոր Հայկ Խանումյանի կողմից կազմակերպված հավաքները ի՞նչ ազդեցություն ունեցան կամ կարող են ունենալ Արցախի հասարակական և ներքաղաքական կյանքի վրա։

Աշոտ Ղուլյան - Այն, ինչ ձեռնարկվել է նախորդ հավաքների ժամանակ, ցույց է տալիս, որ Արցախի հանրության շատ փոքր մասն է հետաքրքրված այն գաղափարներով, որոնք ներկայացնում է Հայկ Խանումյանը և ոչ միայն նա։ Հանրային ակտիվության խմբերը, կարելի է ասել, իրենց շուրջ հավաքում են ընկերներին, բարեկամներին։ Կարծում եմ՝ Արցախի իշխանություններին ամեն ինչում կարելի է մեղադրել, բայց ոչ այս իրավիճակին ադեկվատ չարձագանքելու մեջ։ Երկրի տնտեսական զարգացվածությունը, սոցիալական հարցերի լուծումը, արդարության պակասը, կադրային հարցերի ոչ հիմնավորված լինելը. սրանք հարցեր են, որ հասարակության մի մասը կարող է թերացումներ գտնել։ Բայց որևէ քաղաքական ընտրազանգված չի հետևում նմանատիպ հավաքներին։ Ինձ թվում է, որ Հայկ Խանումյանը Արցախի քաղաքական ոլորտի մեջ ամենամեծ առավելություն ունեցող գործիչն է, քանի որ միայն նա է հանրային ակտիվ խմբերի մեջ ԱԺ պատգամավոր և նմանատիպ թեմաներով հնարավորություն ունի խոսելու Ազգային ժողովում։ Բայց, ցավոք, օրենսդրական որևէ նախաձեռնություն չի եղել, որևէ առաջարկ չի եղել: Իհարկե, սա Հայկ Խանումյանի ընտրությունն է: Պարզապես ուզում եմ ասել՝ Խանումյանն այդ առումով ուներ առավելություն և դա կարելի էր օգտագործել ցանկացած թեմա ԱԺ հարթակ բերելու, լսումներ, քննարկումներ կազմակերպելու համար։

Banak.info - Կխնդրեի մեկնաբանեիք Ադրբեջանի ազգային հերոս Ալլահվերդի Բագիրովի հուշաքարի ոչնչացման հետ կապված միջադեպը և խոսակցությունները։

Աշոտ Ղուլյան - Կարծում եմ, որ մեր հասարակության արձագանքը մի քիչ ուշացած է։ Այս թեման պետք է քննարկել ոչ թե պրոցեսը ընթացքի մեջ լինելու կամ ավարտելու ժամանակ, այլ պետք էր խոսել մինչև շիրմաքարը դնելը։ Խոսում ենք աշխատանքի թափանցիկության մասին, բայց մեր հասարակության մի ստվար հատված տեղյակ չէ՝ ինպե՞ս է ստեղծվել այդ գաղափարը, ո՞վ է հեղինակը։ Եթե այսօր ընդդիմադիրները խոսում են իշխանության բաց լինելու մասին, կարծում եմ` այստեղ մտորելու տեղ կա, որ դա վերաբերում է հասարակության մեջ բոլոր պատասխանատուներին. սա միայն իշխանությունների խնդիրը չէ։ Այն հանգամանքը, որ այս երևույթը տեղի է ունեցել այսօրվա քաղաքական իրողությունների ֆոնին, երբ Ադրբեջանը չի էլ թաքցնում իր ռազմատենչ հավակնությունները՝ այն բոլորովին այլ իմաստ և նշանակություն կարող է ստանալ։ Եվ խոսքը այստեղ հանդուրժողականության մասին չէ: Կարծում եմ՝ որևէ մեկը առիթ չունի դժգոհելու Արցախի հասարակության հանդուրժողականությունից: Սա թերևս այս պահին համարժեք արձագանքն է, որ Արցախի հասարակությունը ցուցաբերում է, հասկանալով, որ այսպիսի իրավիճակում մենք խոսում ենք, իմ կարծիքով, գուցե և ավելորդ հանդուրժողականության մասին։ Ես խիստ կասկածում եմ, որ շիրմաքարի հետ կապված պրոցեսի մասնակիցները ի սկզբանե հասկացել են, որ հասարակությունը կարող է այդպես արձագանքել ու նման հետևանքներ կլինեն։

Banak.info - Ինչպե՞ս եք վերաբերվում վերջին օրերին հասարակական և քաղաքական գործիչների կողմից հայտարարված Արցախի հողերի հանձնմանը, հայաստանցի-ղարաբաղցի արհեստական դիսկուրսի ստեղծմանը։

Աշոտ Ղուլյան - Բոլորս էլ տեղյակ ենք, որ տարին մեկ կամ երկու անգամ տարբեր տեղեր այդպիսի խոսակցություններ բացվում են։ Ես վստահ եմ, որ այդ խոսակցությունները բացվում են Արցախում հանրային, քաղաքական և գլխավորապես անվտանգության հարցերի հանդեպ մարդկանց զգացողությանը չտիրապետելու պատճառով։ Սա մեզ համար այն հողը չէ, որ կարելի է տալ կամ չտալ, այլ այն տարածքն է, որ Արցախին պաշտպանում է առաջին հարվածներից։ Դրանք մեր ռազմական գործողությունների օրակարգում չեն եղել: Բոլոր այս գործողությունները պլանավորվել և իրականացվել են միայն այն պատճառով, որ Ադրբեջանը, շատ ձախողումներից հետո էլ, վերսկսել է Արցախի Հանրապետության դեմ իր ագրեսիան։ Ադրբեջանն է զինադադարի խախտողը, պատերազմ հրահրողը, և մենք ամեն անգամ ստիպված ենք եղել մեր ժողովրդի գլխից հեռացնել կրակակետերը. սա է իրականությունը։ Այդ տարածքներում հողի հետ աշխատելիս հաճախ կտեսնեք, որ խաչքար եք հայտնաբերում։ Մենք ոչինչ ապօրինաբար չենք յուրացրել, մենք մեր պատմական հայրենիքից դուրս չենք եկել։ Միայն ԱՀ ժողովուրդը կարող է որոշել այն գիծը, մինչև որտեղ նա կարող է գնալ փոխզիջումների՝ տեսնելով հակառակ կողմի փոխզիջումների պատրաստակամությունը։

Banak.info - Փոխզիջումներ ասելով արդյո՞ք նկատի ունեք տարածքայինը։

Աշոտ Ղուլյան - Այսօր բանակցություններում Ադրբեջանի գլխավոր հետաքրքրությունը տարածքների թեման է։ Բայց տարածքների թեման մենք չենք կարող փակել լրիվությամբ և վերջնականապես, քանի որ Արցախի Հանրապետությունը ևս կորցրած տարածքներ ունի: Եթե Ադրբեջանը հետաքրքրված է տարածքների թեման դարձնել կառուցողական քննարկումների նյութ, ապա պետք է հասկանա, որ դա կարող է լինել միայն Արցախի Հանրապետության կորցրած տարածքների հետ նույն համատեքստում: Հակառակ դեպքում դա մեզ ընդհանրապես որևէ ձև չի հետաքրքրում։

ԼՈՒՐԵՐ