25 հունիսի 2018
Արցախի Հանրապետության Ազգային ժողովի նախագահ Աշոտ Ղուլյանը հունիսի 25-ին ընդունել է «Առաջնորդության դպրոց» հիմնադրամի մի խումբ ուսանողների՝ հոգաբարձուների խորհրդի նախագահ Սամվել Մովսիսյանի գլխավորությամբ։
Ողջունելով երիտասարդներին՝ խորհրդարանի ղեկավարը կարևորել է ապագա առաջնորդների այցելություններն ու հանդիպումները Ստեփանակերտում ու շրջաններում, ովքեր հետագայում համալրելու են պետական կառավարման համակարգը և իրենց աշխատանքում ինչ-որ չափով առնչվելու են Արցախին։
Աշոտ Ղուլյանը ներկայացրել է հանրապետությունում ներքաղաքական վերջին զարգացումներն ու կառավարման համակարգի բարեփոխման գործընթացը, անդրադարձել զարգացման հեռանկարներին։
Շնորհակալություն հայտնելով ընդունելության համար՝ Սամվել Մովսիսյանը նշել է, որ դպրոցի կողմից կարևորվում է համագործակցությունը Արցախի` մասնավորապես կրթական հաստատությունների հետ։
Այնուհետև խորհրդարանի նախագահը պատասխանել է օրենսդիր մարմնի գործունեությանը, Ազգային ժողով-Հանրապետության նախագահ սահմանադրական իրավահարաբերություններին, հանրային կառավարման ոլորտում բարեփոխումների ընթացքի և այլ խնդիրների վերաբերյալ ուսանողների առաջադրած հարցերին։
