ԼՈՒՐԵՐ
Արցախի խորհրդարանը գումարել է հերթական լիագումար նիստը
30 նոյեմբերի 2017

Արցախի խորհրդարանը նոյեմբերի 30-ին գումարել է վեցերորդ նստաշրջանի հերթական լիագումար նիստը:

Բացելով նիստը՝ ԱԺ նախագահ Աշոտ Ղուլյանն անդրադարձել է հանձնաժողովներում և խմբակցություններում 2018թ-ի բյուջեի նախնական քննարկումներին և օրենսդրական նախաձեռնությունների ուղղությամբ տարվող աշխատանքներին:

Սկսելով նիստի աշխատանքները՝ խորհրդարանը լսել է հանրային ծառայությունները և տնտեսական մրցակցությունը կարգավորող պետական հանձնաժողովի նախագահ Հակոբ Ղահրամանյանի ներկայացրած 2018 թվականի տարեկան գործունեության ծրագիրը:

Այնուհետև, հաշվի առնելով Բարձրագույն դատական խորհրդի կազմավորման՝ Սահմանադրությամբ նախատեսված ժամկետները և «Ազգային ժողովի կանոնակարգ» Արցախի Հանրապետության օրենքի 127-րդ հոդվածի պահանջները՝ լիագումար նիստում մեկնարկել է Բարձրագույն դատական խորհրդի անդամի նշանակման գործընթացը:

Սահմանված կարգով «Հայրենիք» խմբակցության ղեկավար Արթուր Թովմասյանը  Բարձրագույն դատական խորհրդի անդամի պաշտոնում խմբակցության անունից առաջադրել է Շուշանիկ Լավրենտի Հայրապետյանի թեկնածությունը, ով երկու տարի առաջ (2015թ. դեկտեմբերին) Ազգային ժողովի կողմից ընտրվել էր Արդարադատության խորհրդի անդամ:

Շուշանիկ Հայրապետյանը շնորհակալություն է հայտնել վստահության համար և նշել, որ ընտրվելու պարագայում գործելու է արդարության և անաչառության սկզբունքով:

Տեղի է ունեցել մտքերի փոխանակություն, որի ընթացքում խորհրդարանում ներկայացված բոլոր խմբակցությունների պատասխանատուները պաշտպանել են առաջարկվող թեկնածությունը:

Մտքերի փոխանակությունից հետո պատգամավորները անցել են գաղտնի քվեարկության, որի ավարտից հետո հաշվիչ հանձնախմբի նախագահ Ռամելա Դադայանը ներկայացրել է քվեարկության արդյունքները: Հաշվիչ հանձնախմբի արձանագրության համաձայն, քվեարկությանը մասնակցած 30 պատգամավորները միաձայն կողմ են քվեարկել Շուշանիկ Հայրապետյանի թեկնածությանը:

Քվեարկության արդյունքներով Ազգային ժողովն ընդունել է որոշում՝ Շուշանիկ Հայրապետյանին Բարձրագույն դատական խորհրդի անդամ նշանակելու մասին:

Նիստի հաջորդ հատվածում պետական նախարար Արայիկ Հարությունյանը պատասխանել է Արցախի Հանրապետության նախագահին հասցեագրված՝ Արցախի կառավարության երաշխավորությամբ տրված վարկային երաշխիքների մասին «Վերածնունդ» խմբակցության հարցապնդմանը:

Պետական նախարարը նշել է, որ Արցախի կառավարության կողմից բյուջետային երաշխիքները տրամադրվել են հիմնականում Արցախի ներդրումային և գյուղի ու գյուղատնտեսության աջակցության հիմնադրամներին, ինչպես նաև մի շարք պետական և մասնավոր ընկերությունների՝ գործող օրենսդրության շրջանակներում:

Անցնելով օրինագծերի քննարկմանը՝ խորհրդարանը լսել և քննարկել է «Քաղաքացիական ծառայության մասին» ԼՂՀ օրենքում փոփոխություն կատարելու մասին» ԱՀ օրենքի նախագիծը, որը ներկայացրել է քաղաքացիական ծառայության խորհրդի նախագահ Բորիս Առուշանյանը: Համաձայն զեկուցողի՝ նախագծի ընդունումը նպատակ ունի հստակեցնել քաղաքացիական ծառայության պաշտոններ զբաղեցնելու համար անհրաժեշտ աշխատանքային ստաժի և փորձի չափանիշները:

«Մարդու իրավունքների պաշտպանի մասին» Արցախի Հանրապետության օրենքի նախագիծն առաջին ընթերցմամբ քննարկման է ներկայացրել արդարադատության նախարար Արարատ Դանիելյանը: Նա նշել է, որ օրենքի ընդունումը պայմանավորված է առկա իրավակարգավորումները 2017թ.-ին ընդունված Սահմանադրությանը համապատասխանեցնելու անհրաժեշտությամբ:

«Առաջարկված նախագծով կկարգավորվեն Մարդու իրավունքների պաշտպանի գործառույթների և լիազորությունների, մարդու իրավունքների պաշտպանի ընտրության, գործունեության երաշխիքների վերաբերյալ դրույթները»,- նշել է Արարատ Դանիելյանը:

Նախագծի ներկայացումից հետո տեղի է ունեցել մտքերի փոխանակություն, որի ընթացում ելույթով հանդես է եկել Արցախի Հանրապետության մարդու իրավունքների պաշտպան Ռուբեն Մելիքյանը: Նա նշել է, որ նախագիծը թե բովանդակային և թե քննարկումների ընթացակարգի տեսանկյունից իրենց բավարարում է:

«Բովանդակային առումով՝ սա լավ օրինակ է միջազգային իրավունքում առկա դրույթների՝ օրենսդրության մեջ բնականոն գործունեության»,-ընդգծել է պաշտպանը:

Արդարադատության նախարարի ներկայացրած «Հանրային ծառայության մասին» ԼՂՀ օրենքում փոփոխություններ և լրացումներ կատարելու մասին» Արցախի Հանրապետության օրենքի նախագծով ևս առաջարկվում է այն համապատասխանեցնել Սահմանադրությանը, հստակեցնել հայեցողական պաշտոնների, բարձրաստիճան պաշտոնատար անձանց, բարձրաստիճան պաշտոնատար անձանց վերադաս անձանց շրջանակը:

Վերոնշյալ բոլոր օրինագծերն ընդունվել են խորհրդարանի կողմից:

Ազգային վիճակագրական ծառայության նախագահ Կարեն Ներսիսյանը խորհրդարանին է ներկայացրել Արցախի Հանրապետության 2018-2020 թվականների պետական վիճակագրական աշխատանքների եռամյա ծրագիրը, որը  ներառում է պետական վիճակագրական գործունեության հիմնական ուղղությունները՝ ըստ երկրի տնտեսական, ժողովրդագրական, սոցիալական և բնապահպանական բնագավառների:

Գլխադասային երկու՝ սոցիալական և առողջապահության հարցերի ու արտադրության և արտադրական ենթակառուցվածքների հարցերի մշտական հանձնաժողովների դրական եզրակացությունից հետո խորհրդարանը հաստատել է ծրագիրը:

Պատգամավորական հայտարարությամբ հանդես են եկել Գագիկ Բաղունցը և Հայկ Խանումյանը:

Ընդմիջումից հետո նիստը շարունակվել է Հանրապետության նախագահ Բակո Սահակյանի, պետական նախարարի և նախարարների մասնակցությամբ: «Ազգային ժողովի կանոնակարգ» օրենքի համաձայն՝ ԱՀ նախագահը և գործադիր իշխանության ներկայացուցիչները պատասխանել են պատգամավորների հարցերին:

Հնչել են էլեկտրաէներգիայի սակագնի, կենսաթոշակների ավելացմանը, շրջկենտրոններում գազաֆիկացման ծրագրերի շարունակականությանը, դպրոցաշինությանը, փախստականների բնակարանային ապահովմանը, Հադրութ քաղաքում ճանապարհների բարեկարգման աշխատանքներին, դպրոցում երեխաների ծանրաբեռնվածությանը, հանրակրթական ծրագրերի վերանայման անհրաժեշտությանը, հուշարձանների պահպանությանը, խաղողագործությանը և այլ թեմաների վերաբերյալ հարցեր:

Նախագահ Բակո Սահակյանը, նիստի ավարտին, որոշ պարզաբանումներ է տվել պատգամավորների հնչեցրած հարցադրումների վերաբերյալ:

ԼՈՒՐԵՐ