ԼՈՒՐԵՐ
Արցախի խորհրդարանում քննարկվել են գիտության, կրթության, մշակույթի, երիտասարդության և սպորտի 2018թ.-ի ֆինանսավորման հարցերը
28 նոյեմբերի 2017

Նոյեմբերի 28-ին տեղի է ունեցել ԱՀ ԱԺ գիտության, կրթության, մշակույթի, երիտասարդության և սպորտի հարցերի ու ֆինանսաբյուջետային և տնտեսական կառավարման հարցերի մշտական հանձնաժողովների համատեղ նիստը՝ Արմեն Սարգսյանի և Ռուսլան Իսրայելյանի նախագահությամբ:

Օրակարգում «ԱՀ 2018թ. պետական բյուջեի մասին» ԱՀ օրենքի նախագծի քննարկումն էր: Ոլորտային ծախսերն են ներկայացրել գիտության, կրթության, սպորտի և մշակույթի ու երիտասարդության ոլորտների նախարարները:

Խոսելով կրթության, գիտության և սպորտի ոլորտին հատկացված  ծախսերի մասին՝ նախարար Նարինե Աղաբալյանը նշել է, որ 2018թ.-ին այն կկազմի 14մլդ 662մլն 900հազ դրամ՝ ներառյալ պետական ապարատի պահպանման ծախսը: Նարինե Աղաբալյանը նաև ընգծել է, որ նախարարությունն այժմ ոլորտային ուսումնասիրություններ է կատարում, որի արդյունքներով նախատեսվում է մշակել  նոր ռազմավարություն:

Այնուհետև պատգամավորները նախարարին են առաջադրել բուհական համակարգի բարելավմանը, տարրական դասարաններում աշակերտների ծանրաբեռնվածությանը, ուսուցիչների աշխատավարձերին, դպրոցական սննդին, արտերկրում սովորող ուսանողների վերադարձին, գիտահետազոտական աշխատանքների ընտրությանը վերաբերող հարցեր:

Մշակույթի, երիտասարդության հարցերի և զբոսաշրջության ծախսերը, նախարար Սերգեյ Շահվերդյանի փոխանցմամբ, կկազմեն շուրջ 2 մլդ դրամ:

Ոլորտային ծրագրերի ֆիանսավորումը ներկայացնելուց հետո նախարարը պատասխանել է պատգամավորների հնչեցրած՝ գրադարանների արդիական գրականությամբ համալրման և գյուղական համայնքներում դրանց կարգավիճակի, տոն և հիշատակի օրերի,  ինչպես նաև համույթների ֆինանսավորման վերաբերյալ հարցերին:

Բյուջեի նախագծի քննարկումները առաջիկա օրերին կշարունակվեն խմբակցություններում: 

ԼՈՒՐԵՐ