ԼՈՒՐԵՐ
Արցախում է ԱՄՆ Կալիֆոռնիա նահանգի խորհրդարանական պատվիրակությունը
08 հոկտեմբերի 2017

 

 

Հոկտեմբերի 7-ին Արցախի Հանրապետության Ազգային ժողովում ընդունել են ԱՄՆ Կալիֆոռնիա նահանգի խորհրդարանական պատվիրակությանը, որի կազմում էին նահանգային Սենատի անդամ Սքոթ Ուլիքը, Ասամբլեայի անդամներ Ադրին Նազարյանը, Դանթե Աքոստան, Լորա Ֆրիդմանը, Մարք Լևինը: Պատվիրակությանը ուղեկցում էին ամերիկահայ համայնքի ներկայացուցիչներ:

Հյուրերին իր աշխատասենյակում ողջունել է Ազգային ժողովի նախագահ Աշոտ Ղուլյանը և ընդգծել Կալիֆոռնիա - Արցախի Հանրապետություն առանձնահատուկ բարեկամական հարաբերությունների և տարբեր մակարդակի պատվիրակությունների հետ ավանդույթ դարձած հանդիպումների կարևորությունը: Անդրադառնալով Կալիֆոռնիայի կողմից Արցախի Հանրապետության անկախության ճանաչմանը՝ խորհրդարանի նախագահը նշել է.  «Համոզված եմ, որ այդ որոշման հիմքում եղել է Կալիֆոռնիայի ժողովրդի և անձամբ ձեր հարգանքը ազատության համար Արցախի ժողովրդի պայքարի, անկախության ճանապարհին գրանցած հաջողությունների և տարածաշրջանում խաղաղություն պահպանելու հարցում նրա ունեցած դերի հանդեպ»:

Այնուհետև ԱԺ նիստերի փոքր դահլիճում տեղի է ունեցել պատվիրակության հանդիպումը խորհրդարանի խմբակցությունների պատասխանատուների հետ, որի ընթացքում մասնակիցները մտքեր են փոխանակել 2016 թվականի ապրիլից հետո Արցախում առկա իրավիճակի, տարածաշրջանի անվտանգության ուղղությամբ իրականացվող աշխատանքների, տարբեր ոլորտներում գործնական կապերի, մասնավորապես կրթական համակարգում հնարավոր համագործակցության հարցերի շուրջ: Պայմանավորվածություն է ձեռք բերվել խորացնելու  համայքների մակարդակով ձևավորված փոխգործակցությունը:

Խորհրդարանում կայացած հանդիպումներին մասնակցել են ԱԺ նախագահի տեղակալ Վահրամ Բալայանը և ԱՀ ԱԳ փոխնախարար Արմինե Ալեքսանյանը:

Տեղեկացնենք, որ ԱՄՆ Կալիֆոռնիա նահանգի Սենատը Լեռնային Ղարաբաղի Հանրապետության անկախությունը և  Արցախի ժողովրդի ինքնորոշման իրավունքը  ճանաչող բանաձև է ընդունել 2014 թվականի օգոստոսի 28-ին:

ԼՈՒՐԵՐ