Մայիսի 18-ին տեղի է ունեցել Արցախի Հանրապետության ԱԺ գիտության, կրթության, մշակույթի, երիտասարդության, սպորտի հարցերի ու ֆինանսաբյուջետային և տնտեսական կառավարման հարցերի մշտական հանձնաժողովների համատեղ նիստը, որը վարում էին հանձնաժողովների նախագահներ Արմեն Սարգսյանը և Ռուսլան Իսրայելյանը:

2016թ. պետական բյուջեի կատարողականի մասին ոլորտային հաշվետվություններ են ներկայացրել կրթության, գիտության, սպորտի և մշակույթի ու երիտասարդության բնագավառների պատասխանատուները:

Մշակույթի և երիտասարդության հարցերի նախարար Նարինե Աղաբալյանի հաշվետվության համաձայն՝  2016 թ.-ին պետական բյուջեից  նախարարությանն է հատկացվել 1մլրդ 371մլն 957հազ դրամ, կատարողականը՝  1մլրդ 317մլն 957հազ կամ նախատեսվածի 96,1%-ը:

Կրթության, գիտության և սպորտի նախարար Սլավա Ասրյանի ներկայացմամբ 2016թ.-ին պետական բյուջեից բնագավառին հատկացված գումարը կազմել է 13մլրդ 963,9մլն դրամ, կատարողականը՝ 13մլրդ 619,4մլն դրամ կամ նախատեսվածի 97,5%-ը:

Խորհրդարանականները կառավարության ներկայացուցիչներին հարցեր են առաջադրել առանձին ծրագրերի ֆինանսավորման ու դրանց արդյունավետության մասին և ստացել անհրաժեշտ պարզաբանումներ:

Մայիսի 19-ին նախատեսված է ԱԺ պաշտպանության, անվտանգության և օրինապահպանության հարցերի մշտական հանձնաժողովի նիստը, որը կանոնակարգի համաձայն, անց է կացվելու դռնփակ: