Դեկտեմբերի 5-ին տեղի է ունեցել ԼՂՀ ԱԺ սոցիալական և առողջապահության հարցերի և ֆինանսաբյուջետային և տնտեսական կառավարման հարցերի մշտական հանձնաժողովների համատեղ նիստը, որը վարել են հանձնաժողովների նախագահներ Արամ Գրրիգորյանը և Ռուսլան Իսրայելյանը:

Նիստի օրակարգում «Լեռնային Ղարաբաղի Հանրապետության 2017 թվականի պետական բյուջեի մասին» ԼՂՀ օրենքի նախագծում նախատեսված սոցիալական ապահովության, նպաստների, կենսաթոշակների և առողջապահության ոլորտի ֆինանսավորման հարցերն էին:

«2017թ. պետական բյուջեով սոցիալական պաշտպանության ոլորտի ծախսերի  համար նախատեսված է 21 մլրդ 794 մլն դրամ:  2017 թվականի հաստատված պետական բյուջեի ծախսերը 2016 թվականի բյուջեի համեմատ կնվազեն 164 մլն դրամով», - զեկույցում նշել է աշխատանքի և սոցիալական հարցերի նախարար Սամվել Ավանեսյանը:

Նախարարի խոսքով 2017 թվականին ևս ոլորտի գերակա ուղղություններ կմնան բնակչության սոցիալական պաշտպանության մակարդակի հետևողական բարձրացումը և ժողովրդագրական իրավիճակի բարելավվումը:

Առողջապահության ոլորտի 2017 թվականի պետական բյուջեով նախատեսված ծախսերը ներկայացրել է առողջապահության նախարար Կարինե Աթայանը:  

«Համակարգի ծախսերը 2017թ. բյուջեի նախագծով կազմել են 5 մլրդ 917,8 մլն դրամ, 2016թ.-ի՝ 5 մլրդ 949,8 մլն դրամի դիմաց: Նվազումը կազմում է 32մլն դրամ»,- նշել է նախարարը:

Գումարի նվազումը նախարարը պայմանավորել է առողջապահական որոշ ծրագրերի կանոնադրական կապիտալի համալրում ծրագրով գումարների փոփոխությամբ՝ մարմամբ:

Զեկուցողները պատասխանել են որոշ ծրագրերի իրականացմանը և դրանց ուղղվող դրամական միջոցների մասին պատգամավորների առաջադրած հարցերին: