Հուլիսի 7-ին վախճանվել է ԼՂՀ երկրորդ գումարման Ազգային ժողովի պատգամավոր, Արցախում ճանաչված մանկավարժ, հասարակական-քաղաքական ակտիվ գործիչ Լավրենտ Բենիկի Գաբրիելյանը:

Լավրենտ Բենիկի Գաբրիելյանը ծնվել է 1951թ.-ի մարտի 8-ին Ասկերանի շրջանի Խնածախ գյուղում, ուսուցչի ընտանիքում:

Ավարտել է հայրենի գյուղի ութամյա դպրոցը:

1966-1970թթ. ուսանել է Շուշիի մանկավարժական ուսումնարանում:

1970-1972թթ. ծառայել է Խորհրդային բանակում:

1974-1979թթ. ուսանել է Երևանի Խաչատուր Աբովյանի անվան մանկավարժական ինստիտուտի պատմության ֆակուլտետում:

1974-1977թթ. հայրենի գյուղի դպրոցում աշխատել է որպես ուսուցիչ:

1977-1979թթ. որպես հրահանգիչ աշխատել է ԼՂ կոմերիտմիության մարզային կոմիտեում:

1979-1981թթ. աշխատել է Կոմունիստական կուսակցության Ստեփանակերտի քաղաքային կոմիտեում հրահանգչի պաշտոնում, միաժամանակ, «Կարմիր դրոշ» թերթի խմբագրությունում, որպես գրական աշխատող:

1981-1992թթ. Ստեփանակերտի թիվ 1 ԲՇԳ –ում եղել է մանկավարժ-կազմակերպիչ:

1992-1995թթ. աշխատել է մամուլի տարածման «Արցախմամուլ» գործակալությունում՝ պետի պաշտոնում:

1995թ. ապրիլի 30-ին Ստեփանակերտի թիվ 7 ընտրատարածքում մեծամասնական ընտրակարգով Լավրենտ Գաբրիելյանն ընտրվել է ԼՂՀ Գերագույն խորհրդի պատգամավոր:

1995թ. հունիսի 23 -1996թ. մարտի 12-ը եղել է ԼՂՀ խորհրդարանի նախագահի տեղակալ:

Եղել է արտադրության և արտադրական ենթակառուցվածքների հարցերի մշտական հանձնաժողովի անդամ:

1998-2000թթ. ծառայել է ԼՂՀ ՊԲ-ում:

2001-2003թթ. աշխատել է արտակարգ իրավիճակների վարչությունում՝ որպես ուսումնամեթոդական բաժնի պետ:

2003-2006թթ. աշխատել է ԺԱՄ հասարակական–քաղաքական կազմակերպությունում՝ որպես Ստեփանակերտի քաղաքային լիազոր ներկայացուցիչ:

2005թ.-ից Արցախի  Ազատամարտիկների միության անդամ էր:

2006-2008թթ. «Ճանշինվերանորոգում» ՓԲԸ-ում եղել է աշխատանքի պահպանման և անվտանգության տեխնիկայի ինժեներ, ԼՂՀ պետհիմնարկների աշխատողների արհեստակցական կազմակերպությունների «Համերաշխություն» ճյուղային հանրապետական միության նախագահ:

2008-2014թթ. աշխատել է Ստեփանակերտի Արհեստագործական ուսումնարանում՝ որպես տնօրեն:

ԼՂՀ Ազգային ժողովն իր վշտակցությունն է հայտնում Լավրենտ Բենիկի Գաբրիելյանի մահվան կապակցությամբ և զորակցություն հայտնում նրա բոլոր հարազատներին ու ընկերներին:

Նրա պայծառ հիշատակը միշտ վառ կմնա արցախցիների սրտերում: