Մարտի 18-ին ԼՂՀ Ազգային ժողովի արտադրության և արտադրական ենթակառուցվածքների հարցերի մշտական հանձնաժողովի նախաձեռնությամբ անց են կացվել խորհրդարանական լսումներ՝ գյուղատնտեսության ոլորտի խնդիրների և պատգամավորներ Վահրամ Բալայանի ու Ալյոշա Գաբրիելյանի հեղինակած «Գյուղատնտեսական կոոպերատիվների մասին» ԼՂՀ օրենքի նախագծի վերաբերյալ:

Քննարկումները վարում էր հանձնաժողովի նախագահ Արպատ Ավանեսյանը:

Միջոցառմանը մասնակցել են ԼՂՀ գյուղնախարար Արամ Մխոյանը և շրջանների վարչակազմերի պատասխանատուներ:

Լսումներին ներկա պատգամավորները պարզաբանումներ ստանալու նպատակով՝ նախագծի համահեղինակներին առաջադրել են օրենքի նախագծին վերաբերող հարցեր, կարծիքներ արտահայտել որոշ հոդվածների վերաբերյալ:

Առաջարկություններով հանդես են եկել նաև շրջանային վարչակազմերի պատասխանատուները:

ԼՂՀ գյուղնախարար Արամ Մխոյանն առաջնահերթ է համարել օրենսդրական դաշտում բարեփոխումներ կատարելուն զուգահեռ բացատրական աշխատանքների կազմակերպումը գյուղատնտեսությամբ զբաղվող ազգաբնակչության հետ:

ԼՂՀ Ազգային ժողովի արտադրության և արտադրական ենթակառուցվածքների հարցերի մշտական հանձնաժողովն առաջիկա օրերին կհստակեցնի իր դիրքորոշումը նշված նախագծի վերաբերյալ: