ԼԵՌՆԱՅԻՆ ՂԱՐԱԲԱՂԻ ՀԱՆՐԱՊԵՏՈՒԹՅԱՆ

 ՆԱԽԱԳԱՀ`                                                                                           Բ.ՍԱՀԱԿՅԱՆ

   14 հունիսի 2013թ.

   ք.Ստեփանակերտ

   ՀՕ-26-Ն

                                            ՊԵՏԱԿԱՆ ԳՈՒՅՔԻ ՄԱՍՆԱՎՈՐԵՑՄԱՆ 2010-2012 ԹՎԱԿԱՆՆԵՐԻ ԾՐԱԳՐԻ

ԿԱՏԱՐՄԱՆ 2012 ԹՎԱԿԱՆԻ ՏԱՐԵԿԱՆ ՀԱՇՎԵՏՎՈՒԹՅՈՒՆԸ

1.  ԸՆԴՀԱՆՈՒՐ ԴՐՈՒՅԹՆԵՐ

Պետական գույքի մասնավորեցման ծրագրի կատարման մասին սույն հաշվետվությունը (այսուհետ` Հաշվետվություն) ներկայացվում է համաձայն «Պետական գույքի մասնավորեցման (սեփականաշնորհման) մասին» Լեռնային Ղարաբաղի Հանրապետության 1998 թվականի ապրիլի 22-ի ՀՕ-16 օրենքի 9-րդ հոդվածի:

Հաշվետվությունն ընդգրկում է 2012 թվականի օրացուցային տարին (այսուհետ` հաշվետու ժամանակաշրջան):

Հաշվետու ժամանակաշրջանում գործողության մեջ է եղել «Պետական գույքի մասնավորեցման 2010-2012 թվականների ծրագրի մասին» Լեռնային Ղարաբաղի Հանրապետության 2010 թվականի մարտի 25-ի ՀՕ-17-Ն օրենքը:

 «Պետական գույքի մասնավորեցման (սեփականաշնորհման) մասին» Լեռնային Ղարաբաղի Հանրապետության օրենքի (այսուհետ` օրենք) 4-րդ հոդվածի համաձայն` նախորդ ծրագրերի ցանկերում ընդգրկված, սակայն չմասնավորեցված ընկերությունները (ձեռնարկությունները), անավարտ շինարարության և «փոքր» օբյեկտները նոր ծրագրի մասն են` վերջինիս ուժի մեջ մտնելու պահից: Հետևաբար, մինչև «Պետական գույքի մասնավորեցման 2010-2012 թվականների ծրագրի մասին» Լեռնային Ղարաբաղի Հանրապետության օրենքի (այսուհետ` Ծրագիր) ընդունումը նախորդ ծրագրերում ընդգրկված, սակայն չմասնավորեցված օբյեկտները համարվում են Ծրագրի մաս:

Հաշվետու ժամանակաշրջանում Ծրագրում լրացումներ և փոփոխություններ չեն կատարվել:

  Հաշվետու ժամանակաշրջանում Լեռնային Ղարաբաղի Հանրապետության կառավարության իրականացրած միջոցառումներն ուղղված են եղել Ծրագրով սահմանված նպատակների իրագործմանը: Մասնավորապես, շարունակվել է մասնավորեցման այն քաղաքականությունը, որը հնարավորություն է տալիս ընկերությունները ռազմավարական ներդրողներին մասնավորեցմամբ ապահովել առավելագույն ներդրումների իրականացումն ու արտադրողականության և շահութաբերության բարձրացման խթանումը:

Պետական գույքի մասնավորեցման և օտարման գործընթացը կանոնակարգելու, գնահատված արժեքները շուկայական արժեքներին համադրելի դարձնելու նպատակով Լեռնային Ղարաբաղի Հանրապետության կառավարության կողմից 2012 թվականին ընդունվել է «Լեռնային Ղարաբաղի Հանրապետության կառավարության 2008 թվականի փետրվարի 26-ի N 76 որոշման մեջ փոփոխություն կատարելու մասին» N 340-Ն որոշումը:

Հաշվետու ժամանակաշրջանում պետական և համայնքային գույքի մասնավորեցումից Լեռնային Ղարաբաղի Հանրապետության պետական բյուջե մուտքագրվել է 44.222.196 դրամ, որից պետական գույքի դիմաց` 25.957.100 դրամ:

Համաձայն «Պետական գույքի մասնավորեցման (սեփականաշնորհման) մասին» Լեռնային Ղարաբաղի Հանրապետության օրենքի` 2012 թվականի ընթացքում  մասնավորեցումից ստացված միջոցներից համայնքների բյուջեներ փոխանցվել է 18.265.096 դրամ:

Հաշվետու ժամանակաշրջանում պետական գույքի օտարումից Լեռնային Ղարաբաղի Հանրապետության պետական բյուջե մուտքագրվել է 71.658.000 դրամ:

Հաշվետու ժամանակաշրջանում պետական գույքի  մասնավորեցման գործընթացի իրականացմանը խոչընդոտներ են հանդիսացել մասնավորեցման ներկայացվող ընկերությունների ցածր գրավչությունը ներդրողների համար, ինչը մասամբ պայմանավորված է դրանց կուտակած պարտքերով և գույքի տեխնիկական անբավարար վիճակով:             

2. ԾՐԱԳՐԻ ԻՐԱԳՈՐԾՈՒՄԸ

2.1. ԸՆԿԵՐՈՒԹՅՈՒՆՆԵՐԻ ԼՈՒԾԱՐՈՒՄԸ

Հաշվետու ժամանակաշրջանում Ծրագրում ընդգրկված 25 ընկերություններից 8-ը գտնվում էր լուծարման գործընթացում, որից երկուսում` «Ստեփանակերտի էլեկտրատեխնիկական գործարան» և «Թիվ 9 համաշինարարական» փակ բաժնետիրական ընկերություններում, լուծարման գործընթացն ավարտվել է, իսկ մնացած 6 ընկերությունները դեռ գտնվում են լուծարման ընթացքում, որի ավարտը նախատեսվում է 2013 թվականին:

Լուծարման գործընթացին խոչընդոտում են լուծարվող ընկերությունների կուտակած խոշոր պարտքերը, ինչպես նաև գույքի օտարման հետ կապված դժվարությունները` պայմանավորված գույքի տեխնիկական անբավարար  վիճակով:

Հաշվետու ժամանակաշրջանում ընկերությունների լուծարման վերաբերյալ տեղեկությունները ներկայացված են N 1 աղյուսակում:

2.2.  ԸՆԿԵՐՈՒԹՅՈՒՆՆԵՐԻ ԵՎ ԸՆԿԵՐՈՒԹՅՈՒՆՆԵՐԻ ԳՈՒՅՔԻ ԿԱԶՄԻՑ

ԱՌԱՆՁՆԱՑՎԱԾ ԿԱՌՈՒՑՎԱԾՔԱՅԻՆ ՄԻԱՎՈՐՆԵՐԻ ՄԱՍՆԱՎՈՐԵՑՈՒՄԸ

2.2.1. ԸՆԿԵՐՈՒԹՅՈՒՆՆԵՐԻ ՈՒՂՂԱԿԻ ՎԱՃԱՌՔԻ ՁԵՎՈՎ ՄԱՍՆԱՎՈՐԵՑՈՒՄԸ

Հաշվետու ժամանակաշրջանում Ծրագրում ընդգրկված 25 ընկերություններից ուղղակի վաճառքի ձևով մասնավորեցվել են երկու ընկերություններ:

 «Ստեփանակերտի կոնդենսատորների գործարան» փակ բաժնետիրական ընկերությունը մասնավորեցվել է ընկերության աշխատավորական կոլեկտիվի անդամներին, իսկ Շուշիի նախկին արտադրական կոմբինատի կարի արտադրամասի շենքը մասնավորեցվել է նախօրոք հայտնի հավանական գնորդ «Հին ընկերներ» սահմանափակ պատասխանատվությամբ ընկերությանը: Մասնավորեցված ընկերությունների գնորդները պարտավորվել են կատարել 98.000.000 դրամի չափով ներդրում և ստեղծել 24 նոր աշխատատեղ, այդ թվում` 2012 թվականին 27.000.000 դրամի չափով ներդրում` ստեղծելով 6 աշխատատեղ:

Հաշվետու ժամանակաշրջանում գնորդների կողմից մասնավորեցված գույքի դիմաց վճարվել է 4.140.000 դրամ` Լեռնային Ղարաբաղի Հանրապետության կառավարության որոշումներով և կնքված մասնավորեցման պայմանագրերով գնորդների համար սահմանված  տարաժամկետ վճարման կարգով:

  Հաշվետու ժամանակաշրջանում ուղղակի վաճառքի ձևով մասնավորեցված ընկերությունների վերաբերյալ տեղեկությունները ներկայացված են N 2 աղյուսակում:

2.2.2  ԸՆԿԵՐՈՒԹՅՈՒՆՆԵՐԻ ԳՈՒՅՔԻ ԿԱԶՄԻՑ  ԱՌԱՆՁՆԱՑՎԱԾ ԿԱՌՈՒՑՎԱԾՔԱՅԻՆ

ՄԻԱՎՈՐՆԵՐԻ ՈՒՂՂԱԿԻ ՎԱՃԱՌՔԻ ՁԵՎՈՎ ՄԱՍՆԱՎՈՐԵՑՈՒՄԸ

Հաշվետու ժամանակաշրջանում Ծրագրում ընդգրկված ընկերությունների գույքի կազմից առանձնացվել և ուղղակի վաճառքի ձևով մասնավորեցվել են 2 կառուցվածքային միավորներ:

Առանձնացված կառուցվածքային միավորներն ուղղակի վաճառքի ձևով մասնավորեցվել են նախօրոք հայտնի գնորդներին` համաձայն ներկայացված հայտերի: Հաշվետու ժամանակաշրջանում նրանց կողմից մասնավորեցված գույքի դիմաց վճարվել է 2.332.900 դրամ:

Ուղղակի վաճառքի ձևով մասնավորեցված 2 կառուցվածքային միավորների գնորդները ստանձնել են կատարել 43.000.000 դրամի չափով ներդրում և ստեղծել 14 նոր աշխատատեղ, այդ թվում` 2012 թվականին` 19.300.000 դրամի չափով ներդրում՝ ապահովելով 2 աշխատատեղի ստեղծումը:

Հաշվետու ժամանակաշրջանում ընկերությունների գույքի կազմից առանձնացված կառուցվածքային միավորների ուղղակի վաճառքի ձևով մասնավորեցման վերաբերյալ տեղեկությունները ներկայացված են N 3 աղյուսակում:

2.2.3. ԸՆԿԵՐՈՒԹՅՈՒՆՆԵՐԻ ԳՈՒՅՔԻ ԿԱԶՄԻՑ ԱՌԱՆՁՆԱՑՎԱԾ ԿԱՌՈՒՑՎԱԾՔԱՅԻՆ

ՄԻԱՎՈՐՆԵՐԻ ԱՆՀԱՏՈՒՅՑ ՏՐԱՄԱԴՐՄԱՆ ՁԵՎՈՎ ՄԱՍՆԱՎՈՐԵՑՈՒՄԸ

Հաշվետու ժամանակաշրջանում Ծրագրում ընդգրկված ընկերությունների գույքի կազմից առանձնացվել և անհատույց տրամադրման ձևով մասնավորեցվել է միայն «Ստեփանակերտի էլեկտրատեխնիկական գործարան» փակ բաժնետիրական ընկերության վառելիքի պահեստարանը:

Հաշվետու ժամանակաշրջանում ընկերությունների գույքի կազմից առանձնացված և անհատույց տրամադրման ձևով մասնավորեցված կառուցվածքային միավորների վերաբերյալ տեղեկությունները ներկայացված են N 4 աղյուսակում:

2.3. «ՓՈՔՐ», ԿԻՍԱՎԵՐ ԵՎ ԱՅԼ ՕԲՅԵԿՏՆԵՐԻ ՄԱՍՆԱՎՈՐԵՑՈՒՄԸ

Հաշվետու ժամանակաշրջանում ուղղակի վաճառքի ձևով մասնավորեցվել են 6 «փոքր», կիսավեր և այլ օբյեկտներ:

Նեդրումային պարտավորություններ ստանձնած ուղղակի վաճառքի ձևով մասնավորեցված 3 օբյեկտների գնորդները ստանձնել են կատարել 47.742.500 դրամի չափով ներդրում և ստեղծել 11 աշխատատեղ, այդ թվում` հաշվետու ժամանակաշրջանում`  18.942.500 դրամի չափով ներդրում:

Հաշվետու ժամանակաշրջանում ուղղակի վաճառքի ձևով մասնավորեցված «փոքր», կիսավեր և այլ օբյեկտների մասին  տեղեկությունները ներկայացված են N 5 և N 6 աղյուսակներում:

2.4. ՊԱՅՄԱՆԱԳՐԱՅԻՆ ՊԱՐՏԱՎՈՐՈՒԹՅՈՒՆՆԵՐԻ ԿԱՏԱՐՈՂԱԿԱՆԸ

Պետական գույքի մասնավորեցման գործընթացի արդյունավետությունը պայմանավորված է նաև մասնավորեցման սուբյեկտների ստանձնած պարտավորությունների կատարմամբ, որոնք վերահսկվում են Լեռնային Ղարաբաղի Հանրապետության կառավարության աշխատակազմի կողմից (այսուհետ` Աշխատակազմ):

Հաշվետու ժամանակաշրջանում մասնավորեցման պայմանագրերով Աշխատակազմի վերահսկողության ներքո գտնվել է 27 գնորդների կողմից ստանձնած պայմանագրային պարտավորությունների կատարումը։ Նշված գնորդների կողմից 2012 թվականին նախատեսվում էր իրականացնել 479.700.000 դրամի ներդրումներ, իսկ սոցիալական երաշխիքների մասով՝ ստեղծել 77 աշխատատեղ: Փաստացի գնորդների կողմից հաշվետու ժամանակաշրջանում կատարվել է 414.227.000 դրամի չափով ներդրում և ստեղծվել  62 նոր աշխատատեղ:

Պայմանագրային պարտավորությունների կատարման ժամկետը հաշվետու ժամանակաշրջանում լրացած 8 մասնավորեցման սուբյեկտներ  ստանձնել են կատարել 1.206.800.000 դրամի չափով ներդրումներ և ստեղծել 78 նոր աշխատատեղ: Աշխատակազմի կողմից իրականացված դիտարկումների և ստուգումների արդյունքում արձանագրվել է հետևյալ կատարողականը` ներդրումների մասով` 1.125.505.000 դրամ, աշխատատեղերի մասով` 39 աշխատատեղ: Պայմանագրային պարտավորություններն ոչ պատշաճ կատարած մասնավորեցման սուբյեկտներին ներկայացվել է 1.168.100 դրամի չափով տուգանքի վճարման պահանջ: Բացի այդ, մեկ օբյեկտի մասնավորեցման պայմանագիրը լուծելու և մասնավորեցված օբյեկտը բռնագրավելու հայցով Աշխատակազմը դիմել է Լեռնային Ղարաբաղի Հանրապետության ընդհանուր իրավասության առաջին ատյանի դատարանին: 

Հաշվետու ժամանակաշրջանի վերջի դրությամբ պայմանագրային պարտավորությունների կատարման ժամկետը լրացած ընկերությունների, ընկերությունների գույքի կազմից առանձնացված կառուցվածքային միավորների, «փոքր» և կիսավեր օբյեկտների գնորդների կողմից պայմանագրային պարտավորությունների կատարման մասին տեղեկությունները  ըստ առանձին ընկերությունների և օբյեկտների ներկայացված են N 7 աղյուսակում:   

Աղյուսակ N 1

ՏԵՂԵԿՈՒԹՅՈՒՆՆԵՐ

ՀԱՇՎԵՏՈՒ ԺԱՄԱՆԱԿԱՇՐՋԱՆՈՒՄ ԸՆԿԵՐՈՒԹՅՈՒՆՆԵՐԻ ԼՈՒԾԱՐՄԱՆ ԳՈՐԾԸՆԹԱՑԻ ՄԱՍԻՆ